Message from the Principal – Aho 20 Novema 2020

Si’i Ngaahi Matu’a Tauhi Fanau

Malo e tau mo ‘api na pea pea fakafeta’i ‘etau hao mai. ‘Oku toe pe ki’i uike ‘e 1 pea tau mavae mo e ta’u fakaako ni. He’ikai ala fakama’opo’opo ‘a ho’omou tokoni, ko e kakava mo e ongosia, kae fakatauange ‘e liliu kotoa pe ko e fu’ufu’unga tapuaki ke ‘inasi ai si’etau fanau.

  1. Fakamalo atu ‘i ho’omou tokoni mai ‘i he Pasaa ‘a e fanauako. Na’e faingamalie pe ‘enau patiseti, ‘a ia ‘oku ‘i he $35,000.
  2. ‘Oku mau hanga atu ‘eni ki he Sapate faka’osi ‘o e ta’u, pea ‘oku tapuaki ai mo e ki’i misinale ‘a e Kau Ngaue ‘o e Kolisi. Ko honau ‘inasi ki he patiseti ‘a e Kolisi ko e $35,000 pea ko e hulu ‘i he pa’anga ko ia, ‘e fakahoko ‘aki ‘a e tokoni ki hono monomono mo fakalelei ‘a e fanga ki’i ‘api nofo’anga ‘o e kau ngaue.
  3. Ko e toe kole faka’osi atu pe Kau Tauhi Fanau fekau’aki mo ‘etau fanau ‘oku ‘ikai pe ke nau toe ‘asi mai ki Kolisi ni. Pe ko e ha ho’omou fokotu’utu’u, kae fetu’utaki mai mu’a he Tokonaki pe ko e Monite ke fakamahino honau ‘alunga.
  4. ‘E tutuku atu ‘etau fanau ‘i he ‘aho Pulelulu kaha’u taimi 12 ho’ataa pe ofi ki ai. ‘Oku ‘i ai ‘a e faka’amu ke mou lava mai ‘o ‘ave atu ‘enau mohenga mo e puha vala.
  5. ‘Oku nau fakataha hake ki he Hall ‘o e Kolisi Kuini Salote ‘i he ‘aho Tu’pulelulu kaha’u taimi 10 pongipongi ki he Tanakitu’unga. Mou kataki pe ‘o fakatokanga’i ange ‘a e mahu’inga ke tatali pe ‘a e ngaahi fakakahoa ‘etau fanau, kae ‘oleva ke foaki honau ngaahi pale ‘oku nau teunga kakato fakakolisi pe. Pea ke fakapapau’i foki ‘oku kosi lelei ‘a e ‘ulu pea maau mo e teunga fakakolisi kakato.
  6. Ka ‘i ai ha ni’ihi ‘e uesia ‘ene ma’u pale ‘i he ‘ikai foki mai ki he Kolisi pe ko e me’a fakatotongi ako, ‘oku kole atu heni, ke fakakakato mu’a ‘a e ngaue mo e talanoa ko ia ‘i Toloa ni, ‘o ‘ikai ko e Hall ‘o e Kuini Salote pe ko e telefoni.
  7. ‘Oku toe fakaongo atu pe mo e Po Hiva faka-killsimasi ‘a e Music Academy ‘i he Hall ‘o e Kolisi Kuini Salote ‘i he taimi 7 efiafi Falaite ‘aho 4 ‘o Tisema.
  8. Lolotonga ‘a e Tutuku, ‘oku vahevahe atu pe ‘a e ki’i fatongia le’o taki ‘aho 3 ki he fanauako form 3 ki he form 6 mo e TVET ta’u 1. ‘Oku ‘ikai le’o ‘a e fanauako forms 1 mo e 2 pea pehee ki he kau ta’u tutuku. Pea ‘oku anga pehee ni leva hono fokotu’utu’u ‘o e le’o, Ko ‘enau vakai pe ki he uike ‘oku nau le’o ai, pea tuli mai ‘a e 6 efiafi Monite ‘o e uike ‘ko ia. Te nau mohe kotoa pe ‘i Toloa ni ‘i he efiafi Monite ‘o toki tutuku atu ‘i he taimi 4 efiafi Tu’apulelulu. Te nau omi mo e ki’i teunga ako, ki’i vala ma’a mo e vala si’i fakafe’unga pe ki he ‘aho ‘e 3. Pea ke to’oto’o mai foki ha ki’i mohenga fe’unga pe.

‘Oatu ‘a e popoaki fie kaunga mamahi mo kinautolu ‘oku tangi pea mo e talamonu ki he kau ikuna mo ha ma’alali fiefia. ‘Oku tau fakafeta’i pe ha me’a ‘oku tau ‘i ai, he ‘oku kei Satai pe ‘a Satai pea mo’oni ‘a e Saame ‘o e ‘aho – Ko hotau ‘Otua ia. Pea ko kitautolu, ko e kakai ‘oku ne fafanga mo e sipi ‘oku ne tauhia.

Mo e hufia atu pe

TOLOA

This entry was posted in Uncategorized. Bookmark the permalink.