Message from the Principal – ‘Aho 2 ‘Okatopa 2020

Si’i Ngaahi Matu’a Tauhi Fanau

Malo ho’omou ngaue mei ‘api na pea malo e poupou mo e hufia mai ‘etau ngaue ‘oku fai atu mei ‘api ni. Kuo tau lakai ‘a e uike hono 2 ‘o e Teemi 4 pea ‘oku tau hiva tu’u pe hono fiefia mo e fakafeta’i. Ko e kaveinga ‘oku fakafelongoaki mai mo ‘Okatopa – Ko e Talafa’unga mo e To’utupu Ako Lelei. ‘Oku tala ‘a e ‘akau mei hono fua. He ko e ‘akau lelei, ‘oku fua lelei. Pea ko e Ako Lelei ‘oku fua lelei mo ‘aonga ki he kaunga fononga pea e’a ai foki ‘a e langilangi ‘o e ‘Otua.

1.       Na’e fakamanatu he ‘aho ni ‘a e ‘Aho fakamamani lahi ‘o e Kau Faiako, pea na’a mau fakamanatu ‘aki pe hono Lotu Fakafeta’i mo kaunga fiefia mo ‘etau fanau.  Na’e fakahoko ai pe ‘e he Kau Ifi ‘o e Kulupu 2 ‘a e fasi malie “Ko e Ivi ‘o e Lami” ko ‘enau talamonu mo e fakalotolahi ki he Kau Faiako, ‘oku ‘ikai ko e pa’anga pe ko e koloa, ka ko e ivi ‘o e Lami, ‘oku malava ‘aki ‘a e fatongia.

2.       Ne mau hoko mai ai pe ki he Fala ‘o Heleni ‘o fakafiefia’i e ‘Aho, ‘aki ‘a e final ‘o e fe’auhi ‘akapulu fakakulupu. Na’e ikuna ‘e he Maka Taitusi ‘a e Under 12, Vaotaa Koula ‘a e U14, Maka Molitoni ‘a e U16 mo e U18. Ko e fanau ne tu’ukimu’a he ngaahi grades; U12 ko Tevita Tali, U14 ko Elijah Paea, U16 ko ‘Ofa Lea’aemanu, U18 ko Peleki’auei Finau pea ko e Man of the Tournament ko Feleti ‘Inoke.

3.       Ne tali mai mei he Sino Ma’u Mafai ki he ngaahi Tohi Fakamo’oni Ako ‘a New South Wales (NESA) ‘i he ‘aho 24 ‘o e mahina ni, ke lesisita ‘a e Kolisi ko Tupou ke fakahoko ‘a ‘enau ngaahi polokalama ako. Pea na’e fakamo’oni ai ‘a e MOU ‘i he vaha’a ‘o e NESA pea mo e FWC, ‘a ia ‘oku ‘a’ana ‘a e Kolisi ko Tupou.  Ko e makamaile ia ‘i he feinga ‘oku fai mei he Kosilio Fale’i ‘a e Kolisi pea mo e Ako Lolotonga ‘i he fetokoni’aki mo e Kolisi Niuingatoni, ke a’usia ‘e he Kolisi ko Tupou ‘a e tu’unga taau mo falala’anga (neongo ko e ‘apiako ‘i tu’a mei ‘Aositelelia) ke ne fakahoko ‘a e ngaahi Polokalama Ako International ‘a e NESA. Fakafeta’i ai pe.

4.       Fakafiefia foki mo hono tali ‘o e Va’a Ako Tekinikale ‘a e Kolisi, TCTVET ke kau atu ki he polokalama tokoni fakapa’anga ‘a e World Bank, ‘i he ta’u hokohoko ‘e 4 ka hoko mai. Na’e fakamo’oni ‘a e aleapau ko ‘eni ‘i he Monite 28 ‘o Sepitema. Pea ‘oku fakataumu’a ke ngaue’aki ‘a e pa’anga ni ke fakaivia ‘a e TCTVET ke toe taha hake mei he certificate level 2 ki he level 3 ‘i he’ene fengaue’aki pea mo e Manukau Institute of Technology, ‘o ‘Okalani, Nu’usila.

5.       ‘Oku kamata ‘a e Sivi Maamaloa ‘i he Tu’apulelulu ‘o e uike kaha’u, ‘a ia ‘oku kau ki ai ‘a e forms 5, 6 & 7.  Tau poupou atu pe ki he mahu’inga ‘o e sivi ko ia pea mo hono tukufakaholo kuo tu’uholoaki mai ‘i he Kolisi ko Tupou ‘i he ta’u ‘eni ‘e 152 pea ‘oku tauhi pe hono papa ‘i he Falelotu Molitoni.

6.       Fakamanatu atu pe ‘a e totongi ako ‘o e teemi 4, ke fakapapau’i pe mu’a ‘oku totongi kae tau’ataina ‘a e sivi ‘etau fanau. Kapau ‘oku ‘i ai ha faingatamaki pea kataki ‘o lava mai pe ke tau femahino’aki.

7.       ‘Oku tutuku atu ‘etau fanau ‘i he efiafi ni ‘o mou ki’i Sapate ‘i ‘api na pea ke nau foki kotoa mai ‘i he efiafi Sapate, taimi 6 efiafi. 

Kaunga fiefia atu mo e ngaahi lotofale ‘oku fai katoanga ‘i ha ma’alali pe ikuna. Ke ‘o e ‘Otua ai pe ‘a e fakafeta’i mo e kololia. Pea ki ha si’i ngaahi lotofale ‘oku hoko ai ha faingata’a pe ha ‘apisia mamahi, ‘oku kei tu’u pe ‘a e Faakinanga – Ko e hufanga kiate kitautolu mo e malohi; Ko e tokoni ‘i he mamahi matu’aki ofi.

Mo e hufia atu pe

TOLOA

This entry was posted in Uncategorized. Bookmark the permalink.