Message from the Principal – ‘Aho 4 Sepitema 2020

Si’i Ngaahi Matu’a Tauhi Fanau

Kuo ta mai ‘a e fafangu ngata’anga ‘o e takai 9 pea ko ‘etau vilo atu ‘eni ki he takai faka’osi ‘o e teemi 3, ko e uike kaha’u ia. Na’e ‘i ai pe fanga ki’i tatusia, fakafeta’i ‘oku tau kei ‘i vaka pe mo IA.

  1. ‘Oku tau hifo atu ki he kamata’anga ‘o Sepitema mo e kuata ‘o e ngaahi fa’ee. Pea ‘oku tau hufia si’etau ngaahi fa’ee ke nau kei ma’u ivi mo e kelesi ke mafana mo kelesi’ia ma’u ai pe ‘a e feohi mo e ‘olita ‘o hotau ngaahi lotofale.
  2. ‘Oku toki faka’osi ‘a e Common Test ‘a e ngaahi kalasi ki lalo ‘i he Pulelulu kaha’u, ko ia ‘oku mahu’inga ke hokohoko atu pe ‘enau teuteu lelei ki ai.
  3. Ko e ‘aho Tusite kaha’u, ‘oku fakalele ai ‘a e Trial ‘a e Potungaue Ako ‘i he teuteu talifaki atu pe ki he covid-19. Pea kuo poaki’i ke nofo pe ‘etau fanau ‘i Toloa ni ‘o sio TV pe mei ai mo ngaue’aki ‘a e ngaahi founga ‘oku tataki mai ‘e he Potungaue Ako.
  4. Na’e kamata ‘a e takai ‘uluaki ‘a e ‘akapulu tautau toko 15 ‘i he uike ni, pea ‘e hokohoko lelei atu ai pe ki he uike kaha’u. Malo si’i kei poupou mo e sponsor ‘a e Talita Project.
  5. ‘Oku hokohoko lelei atu pe ‘a e teuteu ‘a e Kolisi ki he Katoanga Musika ‘o e 2020. ‘Oku fakahoko ‘eni ‘i he taimi 7pm Tu’apulelulu kaha’u (10 Sepitema). ‘Oku ‘ataa pe ke mou me’a mai ‘o mamata, pea kapau ‘oku ‘ikai faingamalie, te mou ma’u pe mei he letio pea mo e live stream. Na’e fakahoko ‘a e solo ‘o e pongipongi ni ‘e Siaosi Tu’a ‘i he fasi “Cornet King” pea mo Saimone Manu mei he ‘iufoni ‘i ha fasi ‘iloa ‘a e kau ta valingi ko e “Czardas”.
  6. Na’e lava ‘i he Pulelulu ko ‘eni, ‘a e ki’i presentation ‘o e fanga ki’i ngaue ‘a e fanau ‘i he polokalama International pea na’e hulu ai pea mo ‘enau ki’i fe’auhi fa’u faiva video. Na’e toe lava mai foki mo e kautaha “Live and Learn” ke ‘a’ahi ‘enau project haisini pea nau toe tala’ofa mai ai pe mo ha toe tangike vai inu ‘e taha ma’ae ngaahi kalasi juniors.
  7. ‘Oku ‘i ai pe fanga ki’i fatongia fakafale ki he polokalama ‘o e efiafi Tu’apulelulu kaha’u, ko ia kapau ‘oku fakahoko atu ‘e he fanau ha ki’i fatongia pea mou kataki pe ‘o tokoni mai.
  8. ‘Oku toe si’i ‘aupito ‘a e ki’i ni’ihi ‘oku te’eki kakato mai ‘a e totongiako ‘o e teemi 3. ‘Oku mahino pe ‘a e fe’amokaki pea mo e masiva, ka ‘oku mahu’inga ange ho’o lava mai ke tau vakai pe ki ai, he ‘oku lahi pe ngaahi founga ia ke tau fetokoni’aki ai.
  9. Kuo fuofuoloa mai ‘emau Sapate ki tua’a pea hange kuo mata ngalo atu ‘a e Sapate ‘i Toloa, kae hange pe ko ia kuo mou mea’i, ko e Sapate – ko e taha’i ‘aho mahu’inga ‘aupito ia ki he mo’ui mo e ngaue ‘a e Kolisi ko Tupou. Ko ia mou kataki pe he fakaongosia, kae tuku mai ‘etau fanau ‘i he 6pm efiafi Tokonaki ke mau ki’i Sapate faka’osi ‘i Toloa ni ‘i he teemi 3.
  10. Ka ‘oku ‘i ai ha faingatamaki, ‘oku ‘i ai pe me’a ko e poaki; kae manatu’i ma’u pe ‘oku toko 900 tupu lahi ‘a e toenga ‘o ‘etau fanau ‘oku mau fokoutua ‘i hotau ‘api ni.

‘Oku tau kau fakataha pe mo e uki ‘a e kaveinga ‘o e mahina ni, ki ha to’utupu falala’anga. ‘Oku maumau tangata ‘a e ta’e falala’anga pea kuo iku siva ai ‘a e ‘amanaki ki ha fanau mohu faiva mo taleniti’ia. Ka ‘oku hakeaki’i ‘e he falala’anga ha tangata, neongo ‘ene masiva mo ngali li’ekina.

Mo e hufia atu pe

Toloa

This entry was posted in Uncategorized. Bookmark the permalink.